எம் பி எல் கே சுதீஷ் மாநிலங்களவையில் இரண்டு முக்கியக் கேள்விகளை மத்திய அரசிடம் முன் வைத்தார்..

ஒன்று குழந்தைகள் பாதுகாப்பு சேவை பற்றிய கேள்வி மற்றொன்று தேசிய நெடுஞ்சாலைகளில் ஏஐ தொழில் நுட்பத்தின் மூலம் போக்குவரத்து மேலாண்மை மற்றும் டிஜிட்டல் கண்காணிப்பு எவ்வாறு நடைபெறுகிறது என கேள்வி எழுப்பினார் அதற்கு மத்திய அமைச்சர்கள் பின்வருமாறு பதிலை கூறினார்கள்..

மாநிலங்களவையில் எம்.பி. எல்.கே. சுதீஷ், மிஷன் வாத்சல்யா திட்டத்தின் செயல்பாடு, குழந்தைகள் பாதுகாப்பு சேவைகள், பதிவு செய்யப்படாத குழந்தைகள் பராமரிப்பு இல்லங்கள், மாநிலங்களுக்கு இடையேயான குழந்தைகள் மீளிணைப்பு நடைமுறைகள் மற்றும் குழந்தைகள் பாதுகாப்பு அமைப்புகளில் உள்ள காலிப்பணியிடங்கள் குறித்து மத்திய அரசிடம் கேள்வி எழுப்பினார்.

இதற்கு மகளிர் மற்றும் குழந்தைகள் மேம்பாட்டு துறை இணையமைச்சர் சாவித்ரி தாக்கூர் எழுத்துப்பூர்வமாக பதிலளித்தார்.

அமைச்சர் தெரிவித்ததாவது:

மிஷன் வாத்சல்யா என்பது குழந்தைகளின் பராமரிப்பு, பாதுகாப்பு, மறுவாழ்வு மற்றும் சமூகத்தில் மீண்டும் இணைத்தலை நோக்கமாகக் கொண்ட மத்திய ஆதரவு திட்டமாகும். இந்தத் திட்டத்தின் செயல்பாட்டை மத்திய அரசு மாநிலங்கள் மற்றும் யூனியன் பிரதேசங்களுடன் தொடர்ந்து ஆய்வுக் கூட்டங்கள், திட்ட ஒப்புதல் வாரிய (PAB) கூட்டங்கள், கள ஆய்வுகள் மற்றும் மதிப்பீட்டு அறிக்கைகள் மூலம் கண்காணித்து வருகிறது.

பதிவு செய்யப்படாத குழந்தைகள் பராமரிப்பு இல்லங்கள் குறித்து, சிறார் நீதி (பராமரிப்பு மற்றும் பாதுகாப்பு) சட்டம், 2015-ன் பிரிவு 41-ன் படி அனைத்து குழந்தைகள் பராமரிப்பு இல்லங்களும் கட்டாயமாக பதிவு செய்யப்பட வேண்டும். பதிவு செய்யாத நிறுவனங்களுக்கு சட்டப்படி தண்டனை விதிக்கப்படும். அவற்றை அடையாளம் காணுதல், பதிவு செய்தல், ஆய்வு மற்றும் ஒழுங்குபடுத்துதல் ஆகிய பொறுப்புகள் மாநில அரசுகள் மற்றும் யூனியன் பிரதேச நிர்வாகங்களிடம் உள்ளன. இதற்காக மத்திய அரசு அவ்வப்போது வழிகாட்டுதல்களை வழங்கி வருகிறது.

தேசிய அளவிலான தணிக்கை மற்றும் குழந்தைகள் மீளிணைப்பு குறித்து, சிறார் நீதி சட்டம், 2015-ல் குழந்தைகளின் மறுவாழ்வு, குடும்பத்துடன் மீண்டும் இணைத்தல் மற்றும் பாதுகாப்பிற்கான முழுமையான சட்ட நடைமுறைகள் ஏற்கனவே உள்ளன. ஒவ்வொரு குழந்தைக்கும் தனிப்பட்ட பராமரிப்பு திட்டத்தின் அடிப்படையில் குடும்பம், தத்தெடுப்பு, வளர்ப்பு பராமரிப்பு அல்லது ஆதரவு திட்டங்கள் மூலம் மறுவாழ்வு வழங்கப்படுவதாக அமைச்சர் தெரிவித்தார்.

மேலும், நீதி ஆயோக்கின் வளர்ச்சி கண்காணிப்பு மற்றும் மதிப்பீட்டு அலுவலகம் (DMEO) 2025-ஆம் ஆண்டு வெளியிட்ட மதிப்பீட்டு அறிக்கையில், மிஷன் வாத்சல்யா திட்டம் மிகவும் பொருத்தமானதும் பயனுள்ளதுமாக இருப்பதால் தொடர்ந்து செயல்படுத்த பரிந்துரைக்கப்பட்டுள்ளதாக அமைச்சர் குறிப்பிட்டார்.

குழந்தைகள் பாதுகாப்பு அமைப்புகளில் காலிப்பணியிடங்கள் குறித்து, குழந்தைகள் நலக் குழுக்கள் (CWC), சிறார் நீதி வாரியங்கள் (JJB), மாவட்ட குழந்தைகள் பாதுகாப்பு அலகுகள் (DCPU), மாநில குழந்தைகள் பாதுகாப்பு சங்கங்கள் (SCPS), மாநில தத்தெடுப்பு வள அமைப்புகள் (SARA) மற்றும் குழந்தைகள் பராமரிப்பு இல்லங்களுக்கு மத்திய அரசு நிதியுதவி வழங்கி வருகிறது. இருப்பினும், காலிப்பணியிடங்களை நிரப்புவது மாநில அரசுகள் மற்றும் யூனியன் பிரதேசங்களின் பொறுப்பாகும். இதனை விரைந்து நிறைவேற்ற மத்திய அரசு தொடர்ந்து ஆய்வு செய்து தேவையான அறிவுறுத்தல்களை வழங்கி வருவதாக அமைச்சர் தெரிவித்தார்.

இந்த முக்கியமான பிரச்சினைகளை மாநிலங்களவையில் எழுப்பிய எம்.பி. எல்.கே. சுதீஷ், குழந்தைகள் பாதுகாப்பு அமைப்புகளை மேலும் வலுப்படுத்தவும், ஆதரவற்ற மற்றும் பாதிக்கப்படும் குழந்தைகளுக்கு சிறந்த பராமரிப்பு மற்றும் மறுவாழ்வு சேவைகள் கிடைப்பதை உறுதி செய்யவும் மத்திய அரசு தொடர்ந்து நடவடிக்கை எடுக்க வேண்டும் என்று வலியுறுத்தினார்.

மேலும்

தேசிய நெடுஞ்சாலைகளில் செயற்கை நுண்ணறிவு அடிப்படையிலான போக்குவரத்து மேலாண்மை குறித்து மாநிலங்களவையில் எம்.பி. எல்.கே. சுதீஷ் கேள்விக்கு பதில் அளித்த நிதின் ஜெய்ராம் கட்கரி

தேசிய நெடுஞ்சாலைகளில் அறிவார்ந்த போக்குவரத்து அமைப்புகள் (Intelligent Transport Systems – ITS), செயற்கை நுண்ணறிவு (AI) அடிப்படையிலான போக்குவரத்து மேலாண்மை மற்றும் டிஜிட்டல் கண்காணிப்பு வசதிகள் தொடர்பாக மாநிலங்களவையில் எம்.பி. எல்.கே. சுதீஷ் முக்கிய கேள்வி எழுப்பினார்.

இதற்கு மத்திய சாலைப் போக்குவரத்து மற்றும் நெடுஞ்சாலைகள் துறை அமைச்சர் நிதின் ஜெய்ராம் கட்கரி எழுத்துப்பூர்வமாக பதிலளித்தார்.

அமைச்சர் தனது பதிலில் கூறியதாவது:

தேசிய நெடுஞ்சாலைகளில் சாலைப் பாதுகாப்பை மேம்படுத்தி, விபத்துகளை குறைக்கும் நோக்கில் மேம்பட்ட போக்குவரத்து மேலாண்மை அமைப்புகள் (Advanced Traffic Management Systems – ATMS) படிப்படியாக செயல்படுத்தப்பட்டு வருகின்றன.

இதன் கீழ் செயற்கை நுண்ணறிவு அடிப்படையிலான வீடியோ சம்பவக் கண்டறிதல் மற்றும் அமலாக்க அமைப்புகள் (VIDES), தானியங்கி வாகன பதிவு எண் அடையாளக் கேமராக்கள் (ANPR), PTZ கேமராக்கள் மற்றும் கண்காணிப்பு கேமராக்கள் நிறுவப்பட்டு, போக்குவரத்தை நிகழ்நேரத்தில் கண்காணித்தல், விதிமீறல்களை கண்டறிதல், விபத்துகளை உடனுக்குடன் அறிதல் மற்றும் விரைவான மீட்பு நடவடிக்கைகளை மேற்கொள்ளும் வசதிகள் ஏற்படுத்தப்பட்டுள்ளன.

தற்போது பெங்களூரு–மைசூரு, துவாரகா எக்ஸ்பிரஸ்வே, லக்னோ ரிங் ரோடு, UER-II, டெல்லி–ஆக்ரா உள்ளிட்ட முக்கிய தேசிய நெடுஞ்சாலை வழித்தடங்களில் ATMS திட்டங்கள் செயல்படுத்தப்பட்டு வருகின்றன.

இந்த தொழில்நுட்பங்கள் மூலம் பயண நேரம், போக்குவரத்து நெரிசல் மற்றும் எரிபொருள் பயன்பாடு குறைந்துள்ளதா என்பது குறித்து இதுவரை தனிப்பட்ட ஆய்வு எதுவும் மேற்கொள்ளப்படவில்லை என்றும் அமைச்சர் தெரிவித்தார்.

ATMS அமைப்புகளுக்கான செலவினங்கள் சில தேசிய நெடுஞ்சாலை கட்டுமானத் திட்டங்களின் மொத்த செலவிலேயே சேர்க்கப்பட்டுள்ளன. தனித்திட்டங்களாக செயல்படுத்தப்பட்ட பகுதிகளில், பெங்களூரு–மைசூரு திட்டத்திற்கு ரூ.3.63 கோடி, துவாரகா எக்ஸ்பிரஸ்வேக்கு ரூ.16.65 கோடி, லக்னோ ரிங் ரோடுக்கு ரூ.55.69 கோடி, UER-II திட்டத்திற்கு ரூ.28 கோடி மற்றும் டெல்லி–ஆக்ரா வழித்தடத்திற்கு ரூ.49.03 கோடி ஒதுக்கப்பட்டுள்ளதாக தெரிவிக்கப்பட்டுள்ளது.

மேலும்,

நாடு முழுவதும் 4 வழிச்சாலை மற்றும் அதற்கு மேற்பட்ட அனைத்து தேசிய நெடுஞ்சாலைகள் மற்றும் விரைவுச் சாலைகள் (சுமார் 52,647 கிலோமீட்டர்) முழுவதும் ATMS அமைப்புகளை கட்டம் கட்டமாக விரிவுபடுத்த மத்திய அரசு திட்டமிட்டுள்ளது.

இதற்காக உள்ளூர், மண்டல மற்றும் தேசிய கட்டுப்பாட்டு மையங்கள் அமைத்து, மையப்படுத்தப்பட்ட கண்காணிப்பு, விபத்து மேலாண்மை, போக்குவரத்து பகுப்பாய்வு மற்றும் ஒருங்கிணைந்த நடவடிக்கைகள் மேற்கொள்ளப்படும். மேலும், நாடு முழுவதும் ஒரே தரநிலையுடன் செயல்படும் ஒருங்கிணைந்த ATMS மென்பொருள் தளமும் உருவாக்கப்பட்டு வருவதாக அமைச்சர் தெரிவித்தார்.

தேசிய நெடுஞ்சாலைகளில் நவீன தொழில்நுட்பங்களை விரிவுபடுத்துவது, சாலைப் பாதுகாப்பை மேம்படுத்துவது மற்றும் போக்குவரத்து மேலாண்மையை திறம்பட செயல்படுத்துவது குறித்து மத்திய அரசின் நடவடிக்கைகள் குறித்து விரிவான தகவல்களைப் பெறும் நோக்கில் இந்த கேள்வியை மாநிலங்களவையில் எம்.பி. எல்.கே. சுதீஷ் எழுப்பினார்.